يوميات تلميذ فاشل

"انت يابنى عملت الواجب"
"لسه يا بابا"
"و مستنى ايه سعادتك لما تكتبه فى الحلم قوم انجر هات كتبك و حاجتك واقعد اكتب الواجب لحسن اقوم اقطعك"
"حاضر يا بابا" يقوم جرى يجيب الشنطه و يقعد نص ساعه يطلع فى الكشاكيل والكتب
"انا هاخرج اشترى حاجات ارجع الاقيك مخلص الواجب لو لقيتك لسه بتتلكع فى عمايله هاقطع الخرزانه على جتتك"
يخرج الاب و يجلس الابن لمشاهده التليفزيون والكتب امامه

اخوه واخته يشوفوه
"اعمل الواجب و خلص و بعدين اقعد اتفرج براحتك"
"وهو هيخلص فى سنته ده زى السحلفه فى عمايل الواجب, مش فالح غير فى اللماضه وبس"
"انا مش عليا النهارده غير خمس اسأله بس"
"طب انجزهم فى السريع علشان تعرف تتابع براحتك"

بعد نص ساعه يتنبه الاخ والاخت على صوت اخيهم الصغير و هو يقول "الحمد لله"
"ايه؟ خلصت ؟ مش ممكن يظهر اننا ظلمناه"
"كل ده بتحل فى الخمس اسأله دول؟ دول يتحلوا فى خمس دقايق يابنى"

رد اخوهم "خلصت اول سؤال فاضل اربعه"