كده وخلاص

بيقولك كل بلاد العالم تعدادها بالنسمه يعنى مثلا تعداد البلد الفلانيه 20 مليون نسمه
انما هنا فى مصر التعداد بالمفتى
معروفه جدا ان تعداد مصر 70 مليون مفتى
لان طبعا الانسان المصرى مش اى انسان تانى ,عنده قدره جباره على انه يعرف كل حاجه
من غير حتى ما يكون سمع عنها قبل كده
و اللذيذ فى الموضوع انه ممكن يكذّب كلام واحد متخصص عملا بالمثل القائل "أسأل مجرب ولا تسأل طبيب"
مع العلم طبعا انه اكيد مش الطبيب
و غالبا بيكون برضه مش مجرب
تلاقى حد راح للدكتور و كتب له دواء وواحد تانى بص على النشره بتاعت الدواء وراح بخضه كده قاله
"اوعى تاخد الدواء ده"
"ليه بس ده الدكتور اللى كاتبهولى"
" انت مش خايف على عمرك"
"يانهار انا لو اعرف ان الدواء كده كنت قلت للدكتور يغيرهولى"
وهما الاتنين اساسا ولا عارفين الدوا ده عباره عن ايه
بس سمعوا فى مكان ما انه خطر - غالبا المذيعه مستضيفه حد دكتور او دكتوره و كانوا بيقولوا يا جماعه الدوا ده مش بونبونى و خطر انكم تاخدوه من غير ما الدكتور يكون كاتبهولكم هما سابوا ده كله و مسكوا فى انه خطر-

و نسيوا الحكمه القائله ان "نصف طبيب يفسد الابدان"
و هما حتى ولا حصلوا صابع الدكتور مش نصف دكتور بحاله

ما علينا نرجع لمرجوعنا
بما انى مصريه صميمه
وسمارى ولونى مصرى
و كل مصرى الله عليه
فانا برضه ليا نصيبى من الفتاوى
بس عاده باحطها فى سياق يعرف اللى قدامى انى بافتى علشان ماياخدوش على انه امر مسلم بيه
يعنى قبلها مثلا اقول "اعتقد ان..." او بعدها اقول "و الله اعلم"
المشكله انه موضوع صعب جدا اننا مانفتيش
دى حاجه كده لا ارادى بتيجى على الانسان
و جايز الواحد لو قعد يومين من غير ما يفتى ولا فتيايه صغيره يمشى فى الشارع يقول "فتيايه واحده وهاديك اللى انت عايزه"

**************************

lol