انا واعوذ بالله من كلمه انا 6

انا ماليش ذكريات كتير مع الناس علشان انا خجوله قوى

وساعات بتوصل انى باتكسف اتكلم مع الناس باخاف اكون بافرض نفسى عليهم
علشان كده لو محدش دخل معايا فى حوار انا مابافتحهوش
ولو فتحته بيكون على قد سؤال واجابته علشان كده دايما فى اى مناسبه لما نقعد كلنا نفتكر الاوقات اللى قضيناها مع بعض باكتشف انى ماقضيتش وقت مع اى حد بدرجه كافيه
اعتقد ان الناس بتاخد موقفى ده (اللى هو الكسوف و قله الكلام ) على انى انا اللى مش عايزه اكون معاهم
انا زهقت من نفسى حاسه انى ضيعت عمرى من غير مااكون مع حد
و حتى الوقت اللى بقضيه لوحدى ضيعته فى حاجات مش مفيده قوى
كرهت انى اقعد اتفرج على الناس و هى مبسوطه مع صحابها من بعيد
كرهت انى اتكسف انى اروح اقولهم ببساطه "ممكن اقعد معاكم"
كرهت الخمول والملل اللى فى حياتى
نفسى فعلا اعرف ازاى انطلق مع اصحابى
نفسى ابطل الهدوء و الاستكانه اللى انا فيهم دول
انا حاسه انى عامله زى الاشباح
باشوف كل حاجه بس ماباشاركش فى اى حاجه و مابأثرش فى اى حاجه
نفسى اعيش حياتى انا بدل مانا مقضياها فى الافلام لما احب انطلق اتفرج على ferris bueller's day off ولما احس ان قدراتى مش قد كده اتفرج على XMen و لما ولما ...
انا زهقت بقى
نفسى لما حد يفتكرنى يلاقى سيل من الذكريات جه على باله, مش يقعد يعصر مخه هو انا كنت مين
نفسى يبقى ليا صفه الناس تعرفنى بيها
المشكله انى طلعت كده
بقالى 20 سنه شخصيتى كده
ابعد ما اكون عن الانطلاق حتى وانا طفله صغيره كانوا الاطفال يحبوا يعملوا شقاوه و مايسمعوش الكلام
انا لما ماما تقولى اعملى كذا اعمله حتى لو ايه
حتى وهى مش موجوده كلامها بيتسمع
عندى احترام غير طبيعى للقواعد والقوانين و زى ماقلت مابحبش افرض نفسى على حد بما فى ذلك الهزار , مبهزرش مع حد الا لو ادانى اشاره ان اوك انى اهزر , ده طبعا لو القواعد اللى انا حاطاها لنفسى مابتمنعنيش انى اهزر مع الشخص ده
تلات اربع خبرتى مكتسبه من خبرات الناس اللى حواليا لان انا ماليش خبره تقريبا
الغريبه انى باخد خبرتهم دى حاجه مسلم بيها و مش باناقشها لانى شايفه انها المفروض تبقى حاجه تراكميه يعنى اللى قبلى ينقلولى خبرتهم فى المواقف اللى عدت عليهم وانا اكتسب خبره فى المواقف اللى ماعديتش عليهم
تانى القواعد اللى انا حاطاها لنفسى بتسيطر على حياتى
بصراحه ساعات باحس انها بتقيدها مش بتحكمها
ساعات بيبقى نفسى انى اقع فى مشكله جايز يكون ده خروج عن الروتين الممل لحياتى
الحاجه الوحيده اللى انا شايفه انى متميزه فيها انى باقدر اشوف الصوره الكليه لما حد يوضحها
مش بالاقى صعوبه فى انى اتابع العلاقات بين الحاجات و بعضها او تأثيرها على بعضها
ماعرفش هل انا كده فى كل حاجه ولا فى البرمجه بس
بس فى الوقت اللى كل زمايلى بيواجهوا صعوبه انهم يفهموا الدنيا ماشيه ازاى وايه علاقتها ببعضها انا باواجه مشكله تانيه خالص انى ازاى الحاجات الى انا فهمتها دى اعملها
الغريب ان لما حد يبقى بيشرح system معقد شويه و كل الناس مش فاهمه وانا اللى فاهمه ماعرفش ليه دايما بيفترضوا ان انا موهومه انى فاهمه وان انا حقيقه مش فاهمه