انا تعبان

"معلش يا احمد ممكن تروح المشوار ده علشان خاطرى"
"بس ده عايزنى اصحاله الصبح بدرى"
"و هو الساعه 9 دى بدرى يابنى"
"يا بابا لما اكون نايم الساعه 7 الصبح اه تبقى بدرى"
"ده مشوار يوم واحد و بعدين انا اديت الناس كلمه عايز تطلعنى عيل قدامهم"
"بعد الشر عنك يا بابا خلاص بس ابقى صحينى الصبح"

احمد يصحى من النوم تعبان و تحت عينيه اسود و مش قادر يفتح عينه و رغم كده يلبس هدومه و هو مكرمشه و حالتها نيله وينزل
بعد حوالى 4 ساعات يرجع احمد من المشوار وهو نفسه يشوف السرير بس تقابله مامته بشويه طلبات
"طب ممكن انزل اشتريلك الحاجات دى بعد اما اصحى من النوم يا ماما؟!"
"واحنا حالنا يقف لحد مانت ما تصحى من النوم ؟ دول مش هياخدوا منك ربع ساعه انزل هاتهم الاول و بعدين تعالى"
نزل الولد المغلوب على امره واشترى الحاجات ورجع بعد نص ساعه من غير ما يغير هدومه اترمى على السرير
بعد نص ساعه لقى باباه بيصحيه من النوم وبيقوله ان عمه جه ولازم يطلع يسلم عليه
"طب ما تقوله يا بابا انى تعبان"
"عيب يا واد عمك يسأل عليك وانت عايز تعمل فيها ابن بارم ديله قوم فز سلم على عمك واقعد معاه"
"حاضر يا بابا"

بعد حوالى ييجى 3 ساعات عمه مشى والولد حاول انه يدخل ينام تانى
"انت هتنام تانى؟!"
"عاوزه حاجه يا ماما؟!"
"انا باقول كفايه نوم كده علشان تعرف تنام بالليل"
"هو انا نمت اساسا علشان تقولولى كفايه نوم"
"يابنى نوم النهار ده وحش و مافيش منه فايده"
"يا ماما ابوس ايدك سيبينى انام ان شاء الله ساعه واحده و بعدين تعالى انصحينى باللى انت عايزاه"
"انت بتتريأ عليا ياواد"
"والله ماقصدى يا ماما بس ابوس ايدك , ابوس رجلك , نا هيغمى عليا لو مانمتش دلوقتى"
"خلاص اتخمد"

بعد كمان نص ساعه اخوه الصغير بيصحيه
"الحق يا احمد خالد على التليفون"
"ماقالش عايز ايه؟"
"لا بس لما قلتله انك نايم قالى اصحيك"
"طب انا قمت اهه"

قام احمد علشان يرد على التليفون
"خير يا خالد فيه ايه؟!"
"انت ايه اللى انت باعتهولى ده, ده الdocument كل حاجه بايظه فيه"
"طب ماتحاول تظبطها"
"مانا حاولت و ماعرفتش, معلش هى مش هتاخد فى ايدك نص ساعه"
"بس انا مش شايف قدامى"
"صحصح كده واشرب كوبايه قهوه و فوّق"
"كوبايه قهوه؟!! ليه هاستحمى فيها"
"علشان تحوّق"

ياعينى احمد فتح الكومبيوتر و قعد يصلح فى الdocumnet و خلص بعد ييجى ساعه و نص و بعته تانى لخالد و دخل علشان ينام
"احمد تعالى اسند معايا التلاجه دى على بال ما انقلها"
"حاضر يا ماما, امال بابا فين ينقل معاكى؟!"
"ده نزل"

بعد ما نقلوا مكان التلاجه دخل احمد تانى علشان ينام
"انت هتنام ؟! استنى لما تتغدى الاول"
"لما اصحى يا ماما"
"و هو احنا هناكل على حلقات . ربنا يهديك يابنى اقعد كل معانا"
"حاضر يا ماما"


بعد ييجى ساعه باباه رجع من بره و اتغدوا

و دخل علشان ينام تانى بس جه باباه
"يابنى غلط انك تاكل وتنام على طول كده"
"مش قادر يا بابا عايز انام"
"طب استنى لما الاكل يتهوى شويه"
"انت عايزنى فى حاجه يا بابا؟"
"لا يابنى ماستغناش عنك ايدا"
"طب ابوس ايدك يا بابا سيبنى انام خمس دقايق بس"
"طب استنى شويه ونام براحتك"
"يا بابا ابوس ايدك انا مطبق بقالى يومين و مانمتش غير الساعتين بتوع الصبح"
"مانت نمت لما جيت"
"هى النص ساعه دى نوم يا بابا"
"وانت ايه اللى يسهرك بالليل ده مضر بالصحه"
"وهو بمزاجى يابابا مش كنت باخلص حاجات"
"مانت اللى بتتدلع و بتسيب الحاجات لاخر الوقت"
"وهو احنا فى ايه ولا فى ايه دلوقتى ابوس ايدك يا بابا , ابوس رجلك , انا هايجرى لى حاجه لو مانمتش دلوقتى"
"ما تتكلم عدل"
"معلش يابابا ممكن نتكلم لما اصحى من النوم"
"كمان عايز تحدد امتى اتكلم وامتى اسكت"
"حرام يا بابا بجد حرام , اروح اموت نفسى يعنى علشان تستريحوا منى , ولا هو يعنى خلاص الساعه اللى هنامها دى هى اللى هتخرب الكون, والله العظيم انا تعبان تعباااااااااااااان و نفسى انام"



بعد اربع ساعات اخوه الصغير بيتفرج على التليفزيون بصوت عالى
"و طى يابنى الزفت ده شويه اخوك نايم جوه"


الحوار ده كله من خيالى واى تشابه فى الاحداث او الشخصيات




عادى يعنى