حلمين قدام

جه على بالى دلوقتى حلمين كنت حلمتهم من فتره مش صغيره
بس مش عارفه ايه اللى فكرنى بيهم دلوقتى رغم انى باحلم بحاجات كتير جدا
المهم الحلم الاولانى
" انا ماشيه فى الشارع و بعدين فجأه كل الناس اختفت وبقيت لوحدى و لقيت قدامى كلب كبير من الرمادى فى اسود دى و ده حالف انه لازم يجيبنى .
انا جريت و مابطلتش جرى غير لما دخلت مسجد و كان هو واقف بره مش بيدخل وانا جوه و خايفه اخرج.
بعد شويه سابنى و بعد شويه عن الباب وانا كنت عايزه اخرج واروح بيتنا بسرعه المهم انا خرجت و بعد شويه لقيت الكلب ده واقف فى الطريق و مش مخلينى عارفه اعدى واحده من اللى واقفين فى البلكونه قالتلى احرقى ملح و هو مش هيقدر يعدى من الملح المحروق ده.
انا استغربت قوى من اللى هى بتقوله ده بس هى بعد ماقلتلى حدفت لى طبق و كيس ملح.
انا رحت فضيت الملح فى الطبق وولعت فيه
بقى الملح يطقطق و هو يبعد
انا فضلت ماسكه الطبق فى ايدى واقرب منه و هو يبعد لحد ماوصلت لبيتنا و دخلت و قفلت الباب ورايا."


ده كان اول حلم ,حلم عجيب قوى و اول واخر مره احلم حلم شبه كده

الحلم التانى بقى
"انا قاعده فى الكليه مع صحابى و شغالين فى المشاريع بتاعتنا و فجأه انا حسيت ان الارض بتتهز و بتسخن بس محدش من اللى حواليا كان حاسس بكده خالص و كانوا عادى.
انا خفت طبعا من الزلزال والحر اللى جه فجأه و لقيت الدنيا عماله تصفر ولونها يغمق ولما بصيت للسما حسيت ان الشمس زى ماتكون بتقع على الارض كانت عماله تقرب بسرعه فظيعه و بعدين وقفت وهى فوق دماغى انا كنت حاسه انى لو مديت ايدى هالمسها و بعدين كأن حد عكس كل اللى حصل ده الدنيا رجعت نورت تانى و الشمس بعدت تانى ورجعت مكانها وانا كنت منهاره و مش قادره اقول حاجه و كل ما اقول لحد "انت شفت؟!" يقولى "شفت ايه؟!" .
كلهم كانوا بيتصرفوا عادى كأن مافيش حاجه حصلت
ساعتها جت واحده صاحبتى وقالتلى "مالك؟!" فحكيتلها على اللى حصل فقالتلى انه جايز يكون ربنا بيحذرك من حاجه انت بتعمليها وان التحذير ده جه فى صوره رؤيا
وانا اقولها انى ماكنتش نايمه وان الحر اللى انا حسيت بيه ده كان استحاله يكون رؤيا وانه كان حقيقى"


حلمين فعلا بارزين و مافيش اى حاجه شبههم
جايز فى الحلم الاولانى المشترك بينه و بين احلامى التانيه هو الكلب بس الكلب ده كان بيتصرف بطريقه مختلفه كأنه بيخطط وبيراقب و يقرر وينفذ على عكس الكلاب اللى فى الاحلام التانيه اللى بتتصرف كأنها كلاب طبيعيه