انا واعوذ بالله من كلمه انا 3

الناس كلها بتفتكر ان انا قويه
مش فى البنيان يعنى قصدى انهم بيفتكروا ان انا tough
انا ساعات فعلا باكون جامده بس ساعات تانيه باكون حاسه انى هشه قوى و اى حاجه ممكن تكسرنى,
لما باتعرض لموقف صعب شويه ساعات باتمنى انى انهار , جايز ساعتها حد يحس ان انا برضه عندى احساس وباتأثر زى كل الناس.

الغريب انى دايما بابقى على وشك الانهيار و بعدين افكر لو انا انهرت او دخلت فى ازمه نفسيه ..او.. او.. اكيد اللى هيخاف عليا و هيتأثر باللى حصل لى ده مايستاهلش منى انى اعمل فيه كده, واللى الموضوع ده مش هيأثر معاه مايستاهلش يشوفنى وانا ضعيفه , غصب عنى بالاقينى بقيت قويه ووقفت من اول وجديد

كتير اشوف ناس تنهار لما حد قريب ليهم يتوفاه الله بس انا اكتر حاجه ممكن تبين انى حزينه فعلا على فقدان حد انى اعيط شويه صغيرين و بعدين ابقى عادى ولا كأن فيه حصلت.

كتير برضه اشوف ناس مكتئبه و منعزله عن العالم علشان حد من صحابهم سابهم او عمل معاهم حاجه , ولما ابص لنفسى الاقى انى فقدت اصدقاء اكتر مما يمكن تخيله لحد فى سنى , و مع ذلك عمرى مادخلت فى ازمه من دول .

بصراحه انا دخلت فى ازمه واحده بس و هى اللى فعلا اقدر اقول انها كانت ازمه بمعنى الكلمه لانى فعلا كنت مكتئبه طبعا ماحدش عرف عنها اى حاجه خالص بس كانت سببها حاجات كتير مع بعض.

نرجع لموضوعنا بقى الناس اللى حواليا متخيلين ان انا جبل, اقدر استحمل اى حاجه
المشكله انهم بيقيسوا حالتهم بحالتى
يعنى مثلا لو حاجه تعبتنى نفسيا يبتدوا يقولوا امال احنا بقى نعمل ايه؟
على فكره الكلمه دى بتجرحنى قوى
بتحسسنى ان انا مابحسش او ان الناس بتبذل مجهود فظيع علشان يحسسونى باللى هما حاسين بيه (حرف السين اتكرر كتير قوى فى السطر ده هههههههههههههههههه)
مش عارفين ان انا طبعى انى اتماسك, مابحبش اطلع ضيقى على الناس
بس انا بافضل اكبت فى نفسى لحد ما الضيق ده يطلع بس وهو حاصله تكبير و تفخيم و كل الكلمات اللى بتوصف انه بقى اكبر واسوأ
و ساعتها محدش بيقدر يستحملنى وبالاقى انى باضطر اختفى شويه علشان مانفجرش فى وش حد تانى لحد ما اهدى خالص
بس فى الفتره دى باحس بوحده فظيعه
كتير بيبقى نفسى فى حد اعيط على كتفه , رغم كده انا عمرى ماعيطت مع حد
لما فعلا باحس انى مش قادره امسك نفسى باروح فى اى مكان لوحدى واعيط
فى المرات القليله اللى فضفضت فيها مع حد من صحابى اتعلمت انى احسن لى انى ماحكيش لحد من صحابى عن حاجه حصلتلى او بتضايقنى
من ردود افعلاهم اللى كانت مختلفه فى كل مره
مره لقيت ان كل اللى حكيته الناس كلها عارفاه و المره دى عرفت ان الانسانه دى لا تؤتمن على شئ
مره كنت متضايقه من حاجه واحده عملتها فيا و حكيتها لصاحبتى الانتيخ قصدى الانتيم لقيتها اخدت الموضوع بعصبيه و عدوانيه و بعدها بفتره اكتشفت انها كانت فاكره انى بألف الحكايه دى علشان اوصل لها كلام من تحت لتحت ( وانا ماعرفش اصلا ايه الكلام اللى من تحت لتحت ده بس هو عمل لنا مشكله و خلاص)
مره تانيه كنت باحكى علشان كنت فعلا محتاجه افضفض مش انى فى مشكله و عايزه حل والاقى صاحبتى كل ما تشوف وشى تقولى هاه عملتى ايه فى المشكله الفلانيه؟ طب عملتى اللى قلتلك عليه؟ طب.. طب.. لحد ماندمت على اليوم اللى عرفتها فيه حاجه عنى رغم انى وضحتلها كذا مره انى مش محتاجه نصيحه وانى عايزه اتكلم بس.

نفسى فى حد زيى لما تكلمه يسمعك و لما تسيبه و تمشى كأنك ماقلتلهوش حاجه
جايز علشان كده الناس بتحب تفضفض معايا
علشان مابفكرهمش بمشاكلهم غير لماهما يبقوا عايزين يفتكروها

المهم انى من كتر مانا مابتكلمش عن مشاكلى الناس فاكره انى يا اما ماعنديش مشاكل يا اما انا بافوت فى الحديد و مافيش حاجه تقف قصادى.

بس انا اساسا لما باتكلم عن مشكله او اى حاجه بتواجهنى مع حد مش باعرف اوصل له الاحساس اللى انا حاساه
اصلى لما باجى اتكلم عن احاسيسى باحس انى عبيطه قوى وانى باتكلم فى حاجات تافهه . اكيد كل الناس بتحس بالاحساس ده فى وقت ما . بس انا الاحساس ده هو اللى بيبان , يعنى مثلا ابقى باتكلم عن قد ايه انا زعلانه وانا باوصل للى قدامى انى باتكلم فى موضوع تافه فمحدش بيحس باى حاجه ولا حتى الموضوع بيعدى على دماغه.

ناس كتير لما بتبتدى كلام معايا نبره صوتهم بتدينى الاحساس ده, انهم حاسين انهم بيقولوا كلام اهبل بس بعد شويه بالاقيهم بيخرجوا احساسهم فعلا مش عارفه هل السبب لان انا باخرج الاحساس ده منهم ولا لانهم هما مش بيقدروا يكتموه اكتر من كده.
لما انا باتكلم مع حد (اى حد) باكون حاسه انى باتكلم عن حاجات هبله , المشكله ان الاحساس بيزيد لحد ما فى الاخر بالاقينى انا اللى باغير الموضوع . وفى الاخر اقعد اكتب كل اللى انا عايزه على الكمبيوتر او على ورقه وبعدين اقطعها
ده احد الاسباب ان البلوج بتاعى بيبقى كله كلام عن نفسى ( علشان مش باقدر اقول الكلام ده وجها لوجه لاى حد, ساعات باتكلم مع اختى وباحس انها بتفهمنى بس هى مشغوله معظم الوقت وانا مشغوله معظم الوقت فمش بنقعد مع بعض كتير)

انا ساعات باصدق ان مشاعرى فعلا متبلده , بس ارجع اقول هى لو متبلده فعلا انا ماكنتش هاخد بالى :D