انا واعوذ بالله من كلمه انا

انا عارفه ان انا بادى احساس للناس ان انا متخلفه عقليا او عندى اعاقه ذهنيه .

جايز علشان مش باتكلم كتير

او جايز علشان مابعرفش اعبر عن اللى فى دماغى كويس. ساعات كتير لما اجى اشرح حاجه الكلمات بتخوننى وماعرفش اعبر عنها

انا عمرى ما كنت كويسه فى الشرح او الكلام بس باسمع كويس جدا, ممكن افهم الحاجه باقل جهد من اللى قدامى –ده لما باكون كويسه انما لو تعبانه المخ الجزمه بيتصدر و بتبقى حوسه- المهم انا قلت ان الموضوع ده ممكن يتحل بالتدريب, مش عارفه ازاى ادرب نفسى انى اتكلم بس يعنى اهه باحاول حتى دلوقتى انا باتكلم كتير احسن من الاول .

مش عارفه ايه سبب المشكله دى جايز علشان طول عمرى باحب اسمع و مبحبش انخرط فى حوار –حلوه انخرط دى. ما علينا- الا لو كنت عارفه كويس جدا انا باتكلم عن ايه

بعد شويه الموضوع بقى مجرد عاده انى مش باتكلم الا وانا مع اهلى او مع اصحابى المقربين و كان عادى انى اقعد اليوم كله ماتكلمش عمرى ماحسيت انها مشكله

بس دلوقتى انا اتغيرت كتير بقيت باتكلم كتير جدا و عادى مع اى حد طالما انه مدينى احساس انه مش متضايق , يوم ما احس ان اللى قدامى اتضايق منى الطبع النيله بيطلع تانى و ببقى كأنى واكله سد الحنك (الحنك باللغه العاميه القديمه يعنى البق , الفم يعنى)

واكيد حقيقه انى باتكسف جدا ماساعدتش خالص فى هذا الموقف , من كتر الكسوف لماحد بيكلمنى لاول مره بيبقى الاجابه على قد السؤال يعنى ايه اخبارك؟ الحمد لله بس فمعظم الناس كانت بتحس انى مش طايقاهم او انى متكبره عليهم وانا من موقعى هذا باؤكدلكم –هى الكلمه العجيبه دى بتتكتب ازاى- انى مش كده خالص غايه ما هنالك انى بس بابقى مكسوفه وضاربه لخمه هتقولولى حتى مع البنات هاقولكم مع اى حد. لو قطه نونوت عليا فى الشارع هاتكسف *shy* بس طبعا فى مساعى جاهده لتغيير اللبخه اللى الواحد بيبقى فيها اهه باقيت باحاول اخبى الكسوف بانى افتح حوار جايز ناخد على الجو. بس لو اللى قدامى حاله من حالى و بيتكسف زيى تبقى مصيبه سودا

كل اللى يعرفونى كويس بيقولوا عليا انى طيبه و لذيذه ودمى خفيف –تخيلوا دمى خفيف ههههههههه- و حاجات تانيه كتير كده بتكسفنى لما بيقولوها *shy* الازمه ان محدش بياخد باله من كل الحاجات دى الا لما يعرفنى لفتره طويله

برضه فيه ناس بتقول ان انا لو بقى عندى شويه ثقه فى نفسى هابقى احسن . طبعا دول ما يعرفونيش لان اللى يعرفنى كويس هيعرف ان عندى ثقه كبيره قوى فى نفسى مش عارفه جت منين رغم انى ماعملتش اى انجاز فى حياتى يقول ان انا ممكن ابقى اى حاجه بس دايما عندى احساس ان انا اقدر اعمل اى حاجه واقدر اعملها كويس .

رغم ان انا عمرى ماجربت اعمل الحاجات اللى انا مقتنعه انى اقدر اعملها دى

هو انا قلت انى اقدر اعمل اى حاجه ؟ مش اى حاجه قوى يعنى فيه حاجه انا اثبت انى مهما عملت هافشل فيها برضه. طبعا عايزين تعرفوا هى ايه

بس من غير ضحك *angry*

اوك الحاجه الوحيده اللى انا فعلا جربتها وفشلت فيها هى الرياضه

جربت العب حاجات كتيره جدا و كلهم فشلت فيهم واخر حاجه كانت السباحه – على فكره انا مابعرفش اعوم-

وقررت انى اتعلم العوم علشان السباحه لذيذه وكان نفسى من زمان اتعلم ازاى اعوم , حتى فى الاوليمبيات باحب اتفرج على منافسات السباحه والغطس * lol *

بعدين اكتشفت انه علشان الجعان بيحلم بسوق العيش انا باحب اتفرج على السباقات دى

المهم نرجع لما حاولت اتعلم العوم كانت ازمه جباره قالولى ارمى نفسك فى الميه و طبشى بايدك ورجليكى شويه واحنا هنبقى واقفين جنبك علشان لا قدر الله لو حصل حاجه و انا ماكدبتش خبر ورحت راميه نفسى على وش الميه واديتها بلبطه

بس وانا كاتمه نفسى –بفتح النون والفاء- لما خلاص بقى عايزه اخد نفسى –برضه بفتح النون والفاء- عايزه اوقف .الغريبه انى ماعرفتش انزل رجلى ولا ايدى ولا اى حاجه انا كنت فوق الميه والميه حلفت ما تنزلنى انا لقيت نفسى باعمل حركات بهلوانيه جباره علشان المس الارض باى طريقه - من غير تريقه, ايوه كنت باتعلم على الشط . بس مش الشط قوى يعنى- و فجأه انا حسيت بايد تخترق المياه وتمسك برقبتى وبترفعنى فوق الميه

انا كنت باغرق وانا مش واخده بالى , ماانا قافله كل حاجه بقى عينى و مناخيرى وودانى اتقفلت طبيعى من نفسها . بس انا اخدت بالى لانى وهما بيشدونى انا لفيت لفات عجيبه كده تحت الميه قبل ما راسى تطلع فوق الميه اتارينى وانا باحاول انزل رجلى علشان تلمس الارض راسى هى اللى نزلت ورجلى فضلت فوق * lol *

و كانت هذه هى محاولتى مع السباحه

مع basket ball بقى دى حكايه تانيه انا عمرى ماعرفت احدف الكوره جوه الحلقه , و عمرى ماعرفت اجرى وانا بانطط الكوره فى نفس الوقت و عمرى ما عرفت اشقط الكوره وانا باجرى برضه من الاخر فشلت فيها فشل ذريع

الvolley ball بقى كانت اول مره احاول اتعلمها ايدى اتجزعت وقعدت يومين مش قادره اعمل بيها اى حاجه فمحاولتش تانى *sad*

انا باقول كفايه كده بلاش بقيت النوادر لحسن انتوا شكلكوا اخدتوا فكره جميله عنى

انا اتكلمت كتير عن نفسى النهارده نبقى نكمل يوم تانى بقى